ಅಭಿವೃದ್ಧಿಗೆ ಸೇವೆ ಟ್ರಸ್ಟ್ ಬದ್ಧ
ವೈ.ಎನ್.ಹೊಸಕೋಟೆ: ಪಾವಗಡ ತಾಲ್ಲೂಕಿನ ಸಮಗ್ರ ಅಭಿವೃದ್ಧಿಗೆ ನಮ್ಮ ಟ್ರಸ್ಟ್ ಸದಾ ಬದ್ಧ ಎಂದು ಟ್ರಸ್ಟ್ ಖಜಾಂಚಿ ದೀಪುರಾಘವೇಂದ್ರ ತಿಳಿಸಿದ್ದಾರೆ.
ಹೋಬಳಿಯ ಆರ್.ಡಿ.ರೊಪ್ಪ ಗ್ರಾಮದ ಸರ್ಕಾರಿ ಕಿರಿಯ ಪ್ರಾಥಮಿಕ ಪಾಠಶಾಲೆಯಲ್ಲಿ 153ನೇ ಮಹಾತ್ಮ ಗಾಂಧೀಜಿ ಜಯಂತಿ ಅಂಗವಾಗಿ ಪಾವಗಡ ತಾಲ್ಲೂಕು ಸಮಗ್ರ ಸೇವಾ ಅಭಿವೃದ್ಧಿ ಟ್ರಸ್ಟ್ಯ ಒಂದು ಒಳ್ಳೆಯ ಕೆಲಸ ಕಾರ್ಯಕ್ರಮದಡಿಯಲ್ಲಿ ಶಾಲಾ ಆವರಣವನ್ನು ಸ್ವಚ್ಛಗೊಳಿಸಿದರು.
ಈ ಸಂದರ್ಭದಲ್ಲಿ ಮಾತನಾಡಿ ನಾವು ಪ್ರತಿ ತಿಂಗಳು ಒಂದು ಗ್ರಾಮದ ಶಾಲೆ ಅಥವಾ ದೇವಾಲಯವನ್ನು ಆಯ್ಕೆ ಮಾಡಿಕೊಂಡು ಅಲ್ಲಿ ಸ್ವಚ್ಛತೆ ಮಾಡುತ್ತೇವೆ ಹಾಗೂ ಸ್ಥಳೀಯ ಜನತೆಯ ಜೊತೆಗೆ ಸಂವಾದ ನಡೆಸಿ ಸಮಸ್ಯೆಗಳನ್ನು ತಿಳಿಯುತ್ತೇವೆ. ಅದರಂತೆ ಆರ್.ಡಿ.ರೊಪ್ಪ ಶಾಲೆಗೆ ಟ್ರಸ್ಟ್ ವತಿಯಿಂದ ಕೊಠಡಿಗಳಿಗೆ ಬಣ್ಣ ಮತ್ತು ಗೋಡೆ ಬರಹ ಮಾಡಲಾಗಿದೆ.
ಈಗಾಗಲೇ ನಮ್ಮ ಡಿಜಿಟಲ್ ಸಂಚಾರಿ ವಾಹನವು ತಾಲ್ಲೂಕಿನ ಗ್ರಾಮಗಳಿಗೆ ಭೇಟಿ ನೀಡುತ್ತಿದೆ. ಅದರ ಮೂಲಕ ಸರ್ಕಾರಿ ಯೋಜನೆಗಳಿಗೆ ಅರ್ಜಿ ಸಲ್ಲಿಸುವುದು, ಆಧಾರ್ ತಿದ್ದುಪಡಿ, ಪಹಣಿ, ಜಾತಿ ಮತ್ತು ಆದಾಯ ಪ್ರಮಾಣ ಪತ್ರ, ಪಡಿತರ ಚೀಟಿ ಸೇರಿದಂತೆ ಹಲವು ಪ್ರಮಾಣ ಪತ್ರಗಳ ಸೇವೆಯನ್ನು ಜನತೆಯ ಮನೆ ಬಾಗಿಲಿಗೆ ನೀಡುತ್ತಿದ್ದೇವೆ. ಇದರ ಉಪಯೋಗ ಪಡೆದವರು ಉತ್ತಮ ಸೇವೆ ಎಂದು ಮೆಚ್ಚುತ್ತಿದ್ದಾರೆ. ಮುಂಬರುವ ದಿನಗಳಲ್ಲಿ ಟ್ರಸ್ಟ್ ವತಿಯಿಂದ ಇನ್ನಷ್ಟು ಯೋಜನೆಗಳು ಪ್ರಾರಂಭಿಸುತ್ತೇವೆ ಎಂದರು.
ಈ ಸಂದರ್ಭದಲ್ಲಿ ಕಾರ್ಯದರ್ಶಿ ಶಶಾಂಕ್, ನಿರ್ದೇಶಕರಾದ ತಿಪ್ಪೇಸ್ವಾಮಿ, ಹರಿನಾಥ, ಬಜ್ಜಪ್ಪ, ಸದಸ್ಯರಾದ ಸುಭಾಷ್, ಅಂಜಿನೇಯಲು, ಭರತ್, ಪ್ರಕಾಶ್, ಚನ್ನಕೇಶವ, ಕುಮಾರ್, ರವಿ, ವಿಶ್ವ, ನವೀನ್, ವಿನೋದ್, ಸುದೀರ್ ಮುಖಂಡರಾದ ತಿಪ್ಪೇಸ್ವಾಮಿ ಶಿಕ್ಷಕ ಚನ್ನಮಲ್ಲಿಕಾರ್ಜುನ ಇದ್ದರು.
ವರದಿ: ಸತೀಶ್
