ವೈ.ಎನ್.ಹೊಸಕೋಟೆ ; ಶ್ರೀರಾಮನವಮಿ ಅಂಗವಾಗಿ ಗ್ರಾಮದ ಬಜರಂಗದಳದ ಕಾರ್ಯಕರ್ತರು ಗ್ರಾಮದಲ್ಲೆಲ್ಲಾ ಶ್ರೀರಾಮ ದೇವರ ಭಾವಚಿತ್ರ ಮೆರವಣಿಗೆ ನಡೆಸಿದರು.
ಗ್ರಾಮದ ವಾಲ್ಮೀಕಿ ಶ್ರೀರಾಮಮಂದಿರ, ತೊಗಟವೀರ ಕಾಲೋನಿ, ಕಾಳಿದಾಸ ನಗರ, ಕನ್ಯಕಾಪರಮೇಶ್ವರಿ ದೇವಸ್ಥಾನ ರಸ್ತೆ, ಸಂತೆ ಊರುಬಾಗಿಲು ಪ್ರದೇಶಗಳಲ್ಲಿನ ರಾಮದೇವಾಲಯಗಳಲ್ಲಿ ನವಮಿಯನ್ನು ಆಚರಿಸಲಾಯಿತು. ಭಕ್ತಾಧಿಗಳಿಗೆ ಹೆಸರು ಬೇಳೆ ಪಾನಕ ಹಂಚುತ್ತಿದ್ದ ದೃಶ್ಯ ಎಲ್ಲೆಡೆ ಕಂಡುಬಂದಿತು. ಸಿದ್ದಾಪುರ ಸೇರಿದಂತೆ ಹೋಬಳಿಯ ವಿವಿಧ ಗ್ರಾಮಗಳಲ್ಲಿ ರಾಮನವಮಿ ಪೂಜೆಗಳು ನೆರವೇರಿದವು.
ನಾಗಲಾಪುರ ಗ್ರಾಮದಲ್ಲಿ ಶ್ರೀರಾಮ ದೇವರಿಗೆ ವಿಶೇಷ ಪೂಜೆ ಹಮ್ಮಿಕೊಳ್ಳಲಾಗಿತ್ತು. ನವಮಿಯಂದು ದೇವಾಲಯದಲ್ಲಿ ಅಖಂಡಜ್ಯೋತಿಯನ್ನು ಬೆಳಗಿಸಲಾಯಿತು. ಮುಂದಿನ 9 ದಿನಗಳ ಕಾಲ ದೇವಾಲಯದಲ್ಲಿ ಪ್ರತಿನಿತ್ಯ ಒಂದೊಂದು ವಿಶೇಷ ಪೂಜೆ ನಡೆದು ಕೊನೆಯದಿನ ದೇವರ ಮೆರವಣಿಗೆಯೊಂದಿಗೆ ಓಕಳಿಯಾಡಿ ಅನ್ನ ಸಂತರ್ಪಣೆ ನಡೆಸಲಾಗುವುದು ಎಂದು ಭಕ್ತರು ತಿಳಿಸಿದ್ದಾರೆ.
ವರದಿ:ಸತೀಶ್
